Assam election 2021 : Akhil Gogoi-a'n nomination paper thehlut
Assam assembly inthlan neih turah jail-a tang mek, activist leh Raijor Dal president Akhil Gogoi chuan Thawhlehni khan Sibsagar leh Mariani biala chuh tumin nomination paper a thehlut.
Akhil Gogoi hian video conferencing kaltlangin Returning Officer hnenah nomination paper hi a thehlut a ni. A hnuah enkawl a nih mekna, Gauhati Medical College Hospital (GMCH)-ah election team-in paper hi an lam a ni.
Gogoi hian nomination paper a thehluh hnu hian, Assam mipuite hnena a thuchah pawh ziakin, kum 2019, December thla aṭang khan BJP chuan an hreng bet tih a sawi. Mipuite chu inthlan neih tur a tana theihtawpa inbuatsaih a, BJP chu state aṭanga umchhuak ngei turin a chah. A party, Raijor Dal chuan assembly inthlan lo awm turah hian BJP chu zirtirna a pe dawn a ni tiin, inthlan neih hunah state mipuite chu Citizenship Amendment Act 2019 dodalna lantirnaa nunna chan, martar mi pangate chu an rilruah hrereng turin a chah bawk.
GMCH kawtah Gogoi thlawptu eng emaw zat pungkhawmin, jail aṭanga chhuah tir tura an phutna leh BJP sorkar an duh lohna thute an lo aupui a ni. Security force-te chuan pungkhawmte hi hnawtdarhin, damdawi-inah hian venhimna pawh tihkhauh zui nghal a ni.
March 3 khan Akhil Gogoi hian Assam-a eptu party hrang hrangte chu inthlanah BJP paihthlak a nih ngei theihna turin common candidate siam zel turin a ngen. BJP paihthlakna tura eptu pawlte an thawkho thei a nih dawn chuan candidate chuh kher pawh a tum ve lo tihte a lo sawi tawh a ni. Mahse Congress kaihhruai eptu ṭangrual pawlah chuan AIUDF an thawhpui theih loh avangin an tel ve ta lo a, Assam Jatiya Parishad nena an thawkdun dawn ta thung a ni.
BJP-in chief ministerial candidate puang dawn lo
BJP state unite president Ranjeet Kumar chuan kumin inthlan neih tura an party chuan chief ministerial candidate an puang lawk dawn lo tih a sawi.
Chief minister ni lai Sarbananda Sonowal leh cabinet minister, North East Democratic Front (NEDA) convenor Himanta Biswa Sarma-te pawhin Chief Minister tur chu party Parliamentary board-in a la thlan tur thu an lo sawi tawh bawk.
Kum 2016 inthlan dawnah khan BJP chuan union minister hlui, Sarbananda Sonowal chu chief ministerial candidate turin a lo puang lawk a ni. BJP bakah Congress kaihhruai ṭangrual pawl pawhin chief ministerial candidate tur hi an siam lo.