Shillong-ah curfew thlah dul

Meghalaya khawpui, Shillong leh a chheh vela buaina chhuak vanga curfew puan chu boruak a muanawm chhoh zel avangin thlahdul a ni. 

Thawhlehni tlai lam khan curfew hi darkar thum chhung thlah dul a ni a, zan dar 6-ah hman chhunzawm leh a ni. Buaina chhuak venthawn thilah venhim hna khauh taka kalpui a ni bawk. East Khasi Hills Deputy Commissioner Matsiewdor War Nongbri chuan buaina chhuak thar a awm tawh lo tih a sawi a, mahse nimin khan curfew hi chu chhunzawm leh a la ni rih tih a sawi. Boruak awm dan azirin ngaihtuah ṭhat leh a ni ang, a ti. 

Police official-te chuan Shillong khawpui chhung hmun ṭhenkhat, mipui punkhawm tamna hmunahte central paramilitary force leh state security force-te dah chhunzawm an la ni tih an sawi. Kar liam ta Zirtawpnia Khasi Students' Union (KSU) ten Citizenship Amendment Act (CAA) duh lohna lantira rally an neih ṭumin non-tribal nen an intibuai a, buaina chhuak vang a, non-tribal nena an intihbuainaah hian mi pathumin nunna an chan a ni.

 

Meghalaya chief minister Conrad Sangma chuan buaina chhuak chungchang chhui chiang tur hian thupek a tichhuak tawh a, ministry of home affairs (MHA) leh Prime Minister office (PMO) official-te pawh an state dinhmun hi a sawipui tawh bawk.