CPI-M in Tripura-a BJP sorkar sawisel

Tripura-a eptu party, Commu­nist Party of India (Marxist) chuan an state-a rorellai, Bharatiya Janata Party (BJP) kaihhruai sorkar chu na taka sawiselin, an rorelna hnuaiah Tripura dinhmun chu kum 1975-a India ramin emergency period a tawn lai aiin a chhe zawk niin an sawi. 

CPI-M Tripura state secretary Gautam Das chuan BJP kaihhruai sorkarin kum hnih ro a rel tawh chhungin dan kenkawh a ni lo a, hmeichhiaten beih an tawk a, eptu party hruaitute leh worker-te chuan beih an tawk fo a ni, a ti. Kum 2018-a sorkarna an chelh aṭang khan BJP chuan eptu party leh mipui nawlpute chu na takin an bei nghal a, tun thlengin an la chhunzawm reng a ni tiin Das chuan a sawi a ni. 

'BJP sorkar kum hnih a din chhungin, CPI-M hruaitu leh worker 13 thah an ni tawh a, BJP member-te kut tuartu mi 2,170 an awm bawk a, heng zingah hian hmeichhia 203 an tel a ni. Kutthlaktute hi tun thlengin tumah man an la awm lo bawk," tiin CPI-M central committee member Das chuan media miten an kawmnaah a sawi. 

CPI-M leh Left party dang member-te chuan beih an tawk fo a, an in leh lo te pawh tihchhiat leh halsak te an ni tih Das chuan a sawi. "Eptu party  member-te dawr 425 vel chu rawk, hal leh tihchhiat sak an ni tawh. An ar vulhna hmun leh sangha dilte tihchhiat sak niin, motor pawh 112 zet BJP member-te hian an tihchhiat sak tawh tih a sawi bawk. 

"BJP chuan state chhunga zirna pawh an suasam nasa a, sorkar school 90 chuang zet chu private party kutah hlan a ni," tiin Das chuan, BJP in Tripura-a sorkarna an chelh ṭan ni, kum 2018 March 3 chu an state tan  'Black Day' ah a puang.