Hmarchhhak state khawpui zawng zawng Rel hmanga inkalpawh vekna turin ruahmanna siam
Zirtawpni liam taa Rajya Sabha inkhawmah Minister of State for Railways Suresh Angadi Channabasappa chuan nakkum 2020-ah hi chuan, hmarchhhak state khawpui zawng zawng rel hmanga inkalpawh vekna turin ruahmanna an siam tih a sawi.
Tunah hian Assam, Arunachal Pradesh leh Tripura state khawpuite chu rel hmanga kalpawh theih an ni a, sorkar laipui chuan nakkumah chuan Sikkim tel lo state dang zawng khawpuite chu rel hmanga pawh tir vek an tum tih Suresh Angadi Channabasappa chuan a sawi a ni.
Sikkim-ah bik hi chuan Rangpo thleng a thawh khatnaa pawh tir phawt tura ruahmanna siam a nih thu a sawi bawk. Railways MoS Angadi Channabasappa chuan zawhna chhangin, 2014-19 chhunga new line/ gauge conversion/doubling infrastructure project thawhna atana hman zat chu kum tinin cheng vaibelchhe 25,894 vel a ni tih sawiin, 2009-14 inkarah kha chuan cheng vaibelchhe 11,527 vel kum tina hman a nih thu a sawi.
Hmarchhak tan bik chuan 2009-14 chhung khan kum khatah cheng vaibelchhe 2,121 vel a nih laiin, 2014-19 chhung khan 161% vela pungin, kum khata an hman zat chu cheng vaibelchhe 5,531 vel a nih thu a sawi bawk.