MCI-in Assam-ah MBBS seat 174 pek belh remti

Medical Council of India (MCI) chuan Assam chhunga college parukah Bachelor of Medicine and Bachelor of Surgery (MBBS) seat 174 pek belh a remti.

Ministry of Health & Family Welfare chuan Zirtawpni liam ta khan thuchhuah siamin Medical Council of India (MCI) aṭanga rawtna leh remruatna awm chu an pawm thu leh counselling thuneitute chu academic year 2019-20 atana Economically Weaker Section (EWS) quota hnuaia MBBS seat-te hnawhkhat nghal turin a hriattir.

Tunah hian Assam-a college parukah hian seat 726 a awm mek a, MCI-in seat pek belh rem a tih leh tak avang hian seat 900 an nei thei tawh ang. Seat awmzat punna hi 25% a ni. Assam-ah hian MBBS zir theihna college paruk - Assam Medical College, Guwahati Medical College, Silchar Medical College, Jorhat Medical College, Fakharuddin Ali Medical College leh Tezpur Medical College-te a awm. 

Assam director of Medical education, Anup Kumar Barman chuan seat awm zawng zawng zinga 10% chu EWS aṭanga general category zirlaite tan dah a ni dawn tih a sawi. Medical college tharah hian a tlangpuiin MBBS seat 100 vel a awm ṭhin tih sawiin, seat 174 pek belh an ni chu college pahnih hawn thar ang deuh thaw a nih thu a sawi bawk.

Barman chuan tun academic session aṭang hian EWS tan 10% seat dah nghal a ni dawn tih a sawi a, MCI-in MBBS seat an sanction zat a pun takah chuan category dangah pawh seat a pung ngei dawn  a ni, a ti. Assam health minister Himanta Biswa Sarma pawhin Union health minister Harsh Vardhan hnenah a thutlukna siam avangin lawmthu a hrilh a, MBBS seat pek belh an nih chuan an state-ah hmasawnna a thlen ngei dawn tih a sawi.