Tripura sorkarin ITCT kutah school 20 vel hlan dawn
Tripura-a BJP-IPFT sorkar chuan zirna kawnga hmasawnna a thlenna turin International Society For Krishna Consciousness (ISKON) - affiliated Indian Tribal Care Trust (ITCT) kutah school 20 vel an hlan dawn.
Tripura-ah hian sorkar leh sorkarin a ṭanpui school 4,398 a awm a, heng zinga 13 hi chu zirlai awm loh avangin khar a ni tawh. School 147-ah chuan zirlai 10 aia tlem an awm bawk. Education minister Ratan Lal Nath chuan Indian Tribal Care Trust hian an kutah school 53 vel hlan turin an ti a, mahse kum nga chhung atana school 20 hlan hmasak phawt chu cabinet-in ṭha an tih thu a sawi. "Inremna pawh kan ziak vat dawn a ni," a ti.
School 20 hlan tur zingah hian West leh South district-ah pasarih ve ve hlan a ni dawn a, Sepahijala district-ah pathum, Khowai district-ah pahnih leh Gomati District-ah pakhat te a ni dawn a ni. Ratan Lal Nath chuan, "ITCT chuan dan leh thupek eng emaw an zawm ve a ngai dawn a, chung zingah chuan Right to Education Act inkaihhruaina dan te, CBSE emaw ICSE emaw pawmpuina te, zirna medium-a English hman te pawh a tel," tiin a sawi.
Heng school-ahte hian a tlem berah zirlai 30 tal an awm a ngai dawn a, state sorkar chuan text book leh midday meal a thlawnin a tumsak bawk ang. ITCT hian zirna lamah thuneihna an nei dawn a, mahse a neihtu nihna erawh an nei dawn lo tih Lal Nath chuan a sawi bawk.