NSCN (K-YA) hel pawla mi langsar tak man

National Socialist Council of Nagaland - Khapalang - Yung Aung (NSCN K-YA) hel pawla an officer senior ber nia sawi, Self Styled Maj Gen Yanghang chu Zirtawpni khan man a ni.

Army leh Assam Rifles-te chuan Zirtawpni liam ta khan beihpui an thlaknaah NSCN K-YA hel pawla an hruaitu langsar tak hi Nagaland-ah an man a ni. Defence lam chuan an mi man hi May thlaa 40th Assam Rifles lambuna mi pahnih an thihnaah khan a inhnamhnawih tih an tarlang a, Nagaland, Manipur leh Arunachal Pradesh-a an pawl chet lakna zawng zawng chu a kaihhruai a nih thu an tarlang bawk. 

Maj Gen Yanghang bakah hian midang pahnih an man tel bawk a, intelli­gence hnen aṭanga an thu­dawn bawhzuia beihpui an thlaknaah Aboi-Mon Road-ah an man ta tih an tarlang. Yanghang hi NSCN pawikhawihna hrang hranga inhnamhnawih leh pawikhawihna tam tak ruahman tua puh a ni a, a lu manah hian cheng nuai nga dah a ni bawk.