Sikkim: By-election-ah SDF-in chak inring

Sikkim-a Sikkim Democratic Front (SDF) president leh chief minister hlui ni bawk Pawan Chamling chuan SDF chu inthlan boruakah an la awm reng tih a sawi a, by-election neih turah pawh hnehna an chan a rin thu a sawi. 

Pawan Chamling chuan thu­neihna an chang leh a nih chuan ṭhalaite tan hna sing ruk an siam dawn tih a sawi bawk.

Sikkim hian seat pathumah by-election an nei dawn a, hetah hian SDF hian hnehna an chang vek a nih chuan majority an siam leh thei dawn a, hemi a nih avang hian an ṭang hle a ni. Chamling chuan seat pathuma by-election neih tur chu an party in an ngaih pawimawh hle thu sawiin, an party worker-te pawh lungrual taka an tum ram an thlen theina atana thawk turin a ti.

Sorkarna siam mek Sikkim Krantikari Morcha (SKM) pawh bei zuiin an sorkarna chu a la nghet lo tih a sawi a, an thutiam pakhatmah an la tihlawhtling lo tih a sawi bawk. SKM thupuangtuin a hmaa a thusawi, Sikkimese ṭhalaite tana hna sing thum siam belh an tum thu chu sawichhuakin, anni chuan thuneihna an chang a nih chuan hna sing ruk an siam belh dawn tih a sawi bawk a ni.

SDF chuan thuneihna an chang leh a nih ngat chuan tuna a nghet loa sorkar hna thawk zawng zawngte chu dah ngheh vek an ni dawn tih a sawi. SDF chuan assembly-a seat awm mek 32 chu seat 40-ah tihpun an tum a, heta ṭanga seat panga chu Limboo Tamang community-te tana dah a nih tur thu an sawi bawk. Kumin state Assembly inthlan­na an neihah khan SDF hian seat 15 an lak laiin SKM hian seat 17 la in majority an nei thung a ni.