Assam-ah lungalhthei phur truck 300 man tawh

Assam state industry minister Chandra Mohan Patowary chuan sorkar kum 2018-19 chhung khan BJP sorkar chuan dan loa lungalhthei phurh vangin truck 300 leh mi 100 vel an man tih a sawi.

Nowgong constituency MP leh Congress minister hlui Pradyut Bordoloi chuan Chief Minister Office thununna hnuaiah dan loa lungalhthei phurh a nih thu a sawi a, hemi chhanlet nan hian Chandra Mohan Patowary chuan BJP sorkarin hma an lak tawhna hi a sawichhuak.

Mohan Patowary chuan BJP-in sorkarna an siam aṭanga thla hnih hnu lawkah khan Assam-a dan loa lungalhthei phurh chungchang chhui turin hma an la nghal tih leh, CID-in an chhui nghal thu a sawi. Nikum October thlaah khan CBI pawh hemi chungchang chhui tur hian an be tawh tih a sawi bawk.

Patowary chuan, "Hemi chung­changah hian Chief Minis­ter chuan October 2018 khan CBI lehkha a thawn tawh a, Central investigating agency hnenah hian ngenna thar kan thlen leh dawn a ni," a ti. An sorkar chuan eirukna an do tih leh an fihlim hle tih a sawi bawk. "Mi tu emawin a eiru tih in hriat chuan min hrilh u la, an lakah hremna lekkawh a ni nghal ang," a ti bawk a ni.