Manipur zirlaiten DM University an khar

All Manipur Students’ Union (AMSU) chuan thuchhuah siamin Thawhṭanni aṭang khan an state-a Dhanamanjuri University chu khar a nih thu an sawi. University hi a mamawh hrang hrangte pek a nih hma chuan an khar dawn tih an sawi bawk.

Dhanamanjuri University hi kum khat dawn chu vice-chancellor, registrar, regular teaching staff leh non teaching-staff nei mumal loin a kal tawh a, syndicate member, academic council leh dean pawh an nei lo a ni. AMSU President, Peter Laishram chuan vice-chancellor, registrar, dean leh official pawimawh dangte tel loa university kalpui reng chuan DM an tham loh zia a tilang chiang hle a ni, a ti.

Laishram chuan a mawhphurtu thuneitute chuan hemi chungchangah hian mawh an phur tur a ni, tia sawiin; thil duhawm lo tak a thleng a nih pawhin mawh an phur tur a ni, a ti bawk. University hawn a nih dawn khan mipuite chuan beiseina sang tak neiin an thlir a, mahse tunah chuan a hming maia kalpui a nih tawh thu a sawi a ni.

DM chu Association of Indian University member a nih loh bawk avangin, university-in certificate a pekchhuahte chu pawm a nih dawn loh thu a sawi bawk. Zirtirtute hnathawk duh loa an nawrh bawk avangin DM-ah hian ni eng emaw zat chu class pawh lak a ni tawh lo a, nimin aṭang khan class kalpui leh a nih loh chuan zirlaite chuan nawrh huaihawt an tum thute pawh an lo sawi tawh bawk a ni.