Assam CM-in nomination paper thehlut

Assam chief minister Sarbananda Sonowal chuan assembly inthlan thawh khatna neih turah, Thawhlehni khan Majuli biala chuh turin nomination paper a thehlut. 

Inthlan thawh khatna hi March 27-ah neih a ni dawn a, hemi atana nomination paper thehluh theih hun chu Thawhlehni khan a tawp a ni. Chief Minister hian nomination paper a thehluh hmain rally-ah thu a sawi hmasa a, he hunah hian NEDA convenor Himanta Biswa Sarma leh state BJP unit president Rajeet Dass bakah, state party in-charge Baijyanta Panda-te pawh an tel. Prime minister Narendra Modi kaihhruaina hnuaia an state hmasawnna atana hmalakna hrang hrangte an thawh chhunzawm zel theihna turin, BJP chu sorkarna siam leh tura thlang tlin turin mipuite a sawm. 

Sonowal chuan state-a BJP sorkarna hnuaiah, kum nga liam ta chhungin hmasawnna nasa tak a thlen thu a sawi. "Assembly inthlan hmasaah khan inthlak danglamna thlen leh ram leh leilung fate nihna venhim kan tiam a, he kan thuthiam hi kan tipuitling a ni. Hei vang hian kan lakah rinna nghat chhunzawm zel turin kan sawm che u a ni," tiin mipui pungkhawmte chu a sawm a ni. 

Assembly inthlan thawh khatna hi bial 47-ah neih a ni dawn a, candidate langsar tak tak an awm. 

Inthlan thawh khatnaa chuh tur zingah hian chief minister Sarbananda Sonowal, BJP MLA nilai Angoorlata Deka, Ashok Singhal, Mrinal Saikia leh Padma Hazarika te, Congress MLA nilai  Rupjyoti Kumri leh Congress minister hlui Bismita Gogoi-te an tel. 

Assam Jatiya Parishad (AJP) president Lurinjyoti Gogoi pawhin bial pahnih, Duliajan leh Naharkatiya aṭangin a chuh dawn a, jail tang mek Raijor Dal hotu Akhil Gogoi pawhin independent candidate angin Mariani leh Sibsagar-ah a chuh dawn bawk. Raijor Dal hi Election Commission in a la recognise loh avangin independent angin an chuh dawn a ni. 

Inthlan thawh khatna atana nomination paper lutte hi March 10-ah enfiah a ni ang a, March 12 thleng inhnuhdawh phal a ni ang.