Manipur-ah hel 20 an ralthuam nen sorkar kutah inpe

Manipur-a hel 20-te chu Thawhlehni khan an ralthuam nen sorkar kutah an inpe.

Hel 20-te hi helpawl pali -  Thadou People’s Liberation Army (TPLA), United National Liberation Front (UNLF), People’s Liberation Army (PLA) leh People’s Revolutionary Party of Kangleipak (PREPAK (Pro)  amite an ni a, Thawhlehni khan state home department chuan an pual hian 1st Battalion Manipur Rifles banquel hall-ah homecoming ceremony a buatsaih a, he hun hi chief minister N Biren Singh chuan a hmanpui a ni. 

Hel inpeten thuneitute kuta ralthuam an thehluhte hi AK-56 rifle pakhat, M-15 rifle pakhat, MK-33 rilfe pakhat, Uzi SMG pakhat, Lathod gun pakhat, Glock 19 pistol pakhat, 9mm pistol paruk, .32 pistol pahnih, .22 pisotal pakhat leh silai mu ṭhahnem tham tak a ni. 

CM Biren Singh chuan hel inpete chu sorkarin a thlahthlam dawn lo tih sawiin, chhawmdawlna hrang hrang an dawn theihna turin state sorkar chuan surrender-cum-rehabilitation scheme a nei tih a sawi. Nunphung pangngai an zawh chhohna tura sorkarin a puih zel tur thu a sawi. 

Surrender-cum-rehabilitation scheme hnuaiah hel inpete hi an bank account-ah cheng nuai li ṭheuh ṭum khatah pek an ni a, rehabilitation camp-ah kum thum an awm dawn a, hemi chhung hian thla tin stipend Rs 6,000 pek ṭhin an ni bawk ang. An ralthuam thehluh aṭangin incentive pek an ni ṭhin bawk.