Assam-in samak veng- him tur special group din dawn

Assam sorkar chuan khawvela samak hmun khata an chen tam berna hmun - Pobitora Wildlife Sanctuary-a samakte venghim tur special group a din dawn.

Morigaon superin­tendent of police, Swapnil Deka chuan intelligence hnen aṭanga thu an dawn danin an state ṭhenawm - Manipur leh Nagaland-a sapel ṭhinte chuan Pobitora hi an bitum thu a sawi a, hemi a nih avang hian special group hi din a ni dawn a ni, a ti. 

Swapnil Deka chuan kum thum kal ta chhung velah kha chuan sapel an awm thu report an dawng lo tih sawiin, tun hnaia sa pelh tum an awm tih report an dawn chu an la thutak hle tih a sawi. Special group an din turah hian hmun pawimawh lai bulhnaia awm khuaa chengte pawh telh an ni dawn tih leh rinhlehlawm nia an hriatte chu an report thuai dawn tih a sawi a ni.

Deka chuan kum thum kal ta chhunga sapel report a awm loh chhan pawh sanctuary chhehvel khuaa chengte hmalakna vang a ni tih a sawi bawk. Pobitora Wildlife Sanc­tua­ry hi km 38 biala zau a ni a, core area km 16 bial a huam tel bawk. Tunah hian samak 102 vel an awm nia chhut a ni a, sq.km-a teha khawvela samak hmun khata awm zat tamna ber a ni.