Nagaland BJP-in ILP laka PIL thehluh sut turin ngen

Nagaland unit Bharatiya Janata Party (BJP) chuan Nilaini khan thuchhuah siamin, an party hruaitu pakhat nia inchhal Ashwini Kumar Upadhyay-a'n Supreme Court-a Inner Line Permit (ILP) khinna tur Public Interest Litigation (PIL) a thehluh lakah an kut an sil tih an tarlang.

Ashwini Kumar Upadhyay hian Bengal Eastern Frontier Regulation, 1873 (BEFR) behchhanin ILP khinna tur hi a thehlut a, Dimapur-a cheng Naga ni lote bungrua leh thil neihte bakah anmahni humhimna turin SC-ah PIL hi a thehlut a ni.

Hei hi Nagaland-a pawl hrang hrang chuan an sawisel nasa hle a, BJP Nagaland state president, Temjen Imna Along chuan hemi chungchangah hian inhnamhnawihna an nei lo tih a sawi. Ashwini Upadhyay chu tunge a nih pawh an hriat loh thu leh zawn­chhuah an tum thu a sawi a, Nagaland BJP-ah Ashwini Upadhyay tih an awm loh thu a sawi a ni.

State BJP president chuan Ashwini Upadhyay chu a PIL sut leh turin a ngen a, Nagaland politics buaina chin­felna turah rah ṭha lo tak a chhuah dawn a ni, a ti bawk.