Tripura panchayat inthlan July 27-ah nei dawn

Tripura-a panchayat pathum inthlanna chu July 27-ah neih a nih dawn thu tarlan a ni a, July 31-ah vote chhiarna neih a ni bawk ang.

Tripura-ah hian gram pan­chayat 591, panchayat samiti 35 leh zilla parishad pariat a awm a, inthlan chungchanga hriattur pawimawhte chu July 1-ah tihchhuah a ni ang. Gram panchayat-ah hian seat 6,111 a awm a, panchayat samiti-ah hian seat 419 a awm thung.

Inthlana ding turte hian July 8 thleng nomination an file thei dawn a, July 9-ah nomination paper-te enfiahna neih nghal a ni bawk ang. July 11 thleng candidate inhnuhdawhna hun hawn a ni dawn a ni. State election commissioner GK Rao chuan nimin khan panchayat inthlana vote thlak thei hi mi 12,03,070 an awm tih a sawi a, model code of conduct hmanṭan nghal a ni tih a sawi. 

Panchayat inthlanah hian EVM hman a ni dawn lo a, local body inthlannaah EVM hmang tura tihna provision a awm loh thu GK Rao chuan a sawi a, ballot paper hman a ni dawn a ni, a ti. Polling booth 2,623 hawn a ni dawn a, District magistrate-te chu district election officer an ni nghal anga, BDO-te chu returning officer an ni nghal bawk ang. Rao chuan venhimna pawh uluk taka kalpui a nih dawn thu a sawi.