Assam election : Inthlan thawh khatnaah candidate 281 awm
Assam assembly inthlan thawh khatna, March 27-a neih tur atan candidate 281 in nomination paper an thehlut.
Inthlan thawh khatna hi bial 47, Upper Assam leh northern Assam biala district 11 huam chhunga assembly constituency 42 leh Nagaon district-a seat pangaah neih a ni dawn a, nomination paper thehluh hun hi Thawhlehni khan tawpin, Nilaini khan paper-te hi enfiah a ni. Inhnuhdawk duhte tan vawiin thleng hun hawn a ni bawk. Inthlan thawh hnihna leh thawh thumna hi April 1 leh April 6-ah neih a ni leh ang.
Kum 2016 inthlanah khan Upper Assam leh northern Assam region-ah hian BJP leh a thawhpui, Asom Gana Parishad (AGP) te an che ṭha hle. Kumina inthlan thawh khatna neihna tur bial 47 zingah bial 35-ah hian an chak a ni. Heng zinga bial 27-ah hian BJP chakin, AGP hian bial 8 an la bawk a, Congress-in 9, AIUDF-in pahnih leh independent candidate-in bial khat an la.
Kum 2019 Lok Sabha inthlanpui neihah pawh khan Upper Assam leh northern Assam region-ah hian BJP-AGP thawkdun an che ṭha hle bawk.
Central observer-in Covid-19 kai
Inthlan thawh khatna neihpui tura Election Commission of India (ECI)-in general observer atana a ruat, Majeet Singh Brar chu Jorhat a thlen hnuah Covid-19 hri a kai tih hmuh chhuah a ni.
Jorhat district deputy commissioner Roshni Aparanji Korati chuan central observer hi Punjab aṭanga kal a ni tih sawiin, coronavirus a kai tih hriat a ni hnuah inah inkhung hran tir nghal a nih thu leh, ngaihtuahawm a nih loh thu a sawi. Central observer hi thlak nghal niin, West Bengal aṭangin midang tirh leh nghal a ni ang.
Inthlan buaipui tura state pawn lam aṭanga kalte chu an awmna tur district an thlen velah Covid-19 test neihsak zel an ni.
CM Sonwowal hausakna kum 5 chhungin 71% in a pung
Chief minister Sarbanada Sonowal chuan inthlan thawh khatnaah hian Majuli bialah a chuh dawn a, a affidavit thehluh aṭangin kum 2016 assembly inthlan dawn aiin a hausakna hi 71% chuangin a pung.
CM thil neih, moveable leh immovable asset hi a vaiin Rs vaibelchhe 3.17 hu a ni a, kum 2016-ah khan a thil neih hi Rs vbc 1.85 a ni. Kum 59 mi, Chief Minister moveable assets hi kum 2016-ah Rs nuai 70.44 a nih laiin, kuminah Rs vbc 1.14 in a pung a, immovable asset hi inthlan hmasaa Rs vbc 1.15 chu kuminah Rs vbc 2.02 ah a pung bawk.
Kum nga chhungin CM hian immovable asset engmah lei belh loh mah se, a hausakna hi 1,32,26,475 in a pung a ni. A sum lakluhna hi a hlawh aṭangin niin a tarlang a, kum 2016 inthlan dawnah kha chuan a eizawnna hi consultant leh agriculturist niin a tarlang thung.