NDA ni lo an sorkar chuan Eptu lamah NPP ṭhu dawn

Meghalaya National People's Party (NPP) chief, Dr WR Kharlukhi chuan BJP kaihhruai National Democratic Alliance (NDA) chuan central-ah thuneihna an chang leh dawn tih sawiin, NDA sorkar ni loin thuneihna an chang a nih erawh chuan NPP chu eptu lamah an ṭhu dawn tih a sawi.

Dr WR Kharlukhi chuan BJP ni loin sorkarna an siam a nih chuan opossition an nih tur thu sawiin, tun dinhmunah chuan engin nge sorkarna siam dawn a la hriat loh thu a sawi. Mahse BJP kaihhruain NDA chuan sorkarna an siam leh ngei a rin thu a sawi thung.

Prime Minister Narendra Modi-a'n Varanasi-a nomination a file ṭuma Meghalaya Chief Minister Conrad Sangma hmuh tur a awm ve chungchang pawh sawiin, NDA an la nih reng thu leh NDA chief minister zawng zawng chu sawm an nih thu a sawi a ni.

Congress in an sawiselna chu chhangletin, NDA-a thawk­ho an ni a, a tir aṭangin an dinnaah an chiang nghal tih a sawi. Engvangin nge Congress-in sawisel an lo neih ve? tiin zawhna a siam nghal bawk. Citizenship Amendment Bill chungchang pawh sawiin hmarchhak leilung fate duh loh zawng thil erawh an do zel dawn tih a sawi. NDA an ni reng chungin CAB chu an do a, BJP in an tharthawh leh a nih pawhin an do leh dawn tih a sawi bawk.