Hmarchhak state hrang hrangah khawlum a zual

Tunhnaiah hmarchhak hmun hrang hrangah khua a lum zual hle a, ruah a sur tlem bawk avangin hmun ṭhenkhatah chuan nunphung a buai hle niin IMD official-te chuan an tarlang.

India Meteorological Department (IMD) in an tarlan dan chuan hmar­chhak state ṭhenkhat, a bikin Assam, Mizoram leh Tripura-ah te chuan kar liamta chhung khan degree celsius 35 leh 38 inkar a nih deuh char char thu an tarlang. Heihi an state temperature pangai ṭhin aiin degree nga zetin a sang a ni. Kumdang tun ang hunah chuan heng state-ah te hian kumin aiin degree nga ten a hniam ṭhin.

IMD chuan March 1 aṭang khan fur hma ruahsur a tlem tih an lo record tawh bawk a, March leh May inkarah hmar­chhak state pasarih (Sikkim lo zawng) ahte chuan 36mm chiah an record.

Arunachal Pradesh meteorological sub-division record sang berin fur hma ruahsur chu 47mm a ni a, Assam leh Meghalaya chuan 33mm-ah record in Nagaland, Manipur, Mizoram leh Tripura sub-division-te chuan 28mm chiah an record thung. 

IMD Director Dilip Saha chuan Indian Ocean leh Bay of Bengal tui­pui boruak bakah cy­clone ‘Fani’ vang te in hmarchhak tlangramah te chuan khua hi a lum phah niin a lang tih a sawi. 

Saha chuan cyclone tleh zawhah chuan thli chuan an thawt dan an thlak leh tawh beiseiin, khawlum pawhin ziaawm lam a pan a beisei tih a sawi a, tunkar chhung chuan boruak pawhin ziaawm lam a pan leh tawh an beisei thu a sawi a ni.

Assam, Mizoram leh Tripura-a Agricultural official-te chuan fur hma ruahsur a tlem avang hian nipui laia thlai chin ṭhinte chuan an tuar ngei dawn tih sawiin, agricultural expert Samar Mitra  chuan ruah a sur vat loh chuan nipui thlai chinte chuan an tuar nasa lehzual dawn tih a sawi bawk.

Tripura Drinking Water leh Sanitation Department Chief Engi­neer Baishapayan Chak­raborty chuan an state chhunga tui thianghlim intur vanna hmunahte chuan tanker hmangin tui in tur an pe tih sawiin, hmun kilkhawr zawk leh tribal area-ahte pawh an pe bawk tih a sawi a ni.