Assam: Fur lo thleng tur atana inralrin dan CM Sarbananda Sonowal hoin sawiho

Assam Chief Minister Sarbananda Sonowal chuan Thawhlehni khan furpui thlen huna tuilian thleng thut thei laka state inralrin dan enfiahin, official-te chu district tinah ei leh in tur chhekkhawl lawk turin a ti.

Sarbananda Sonowal chuan Forest Department-te chu Transport Depart­ment nen lungrual taka thawk dun tura hrilhin, Kaziranga National Park-a ramsa awmte pawhin hmun him lam an pan huna chhiat thutna thleng thei leh kawng an kan hunah pawh an him theih nana hma la turin a ti a ni.

Forest Department official-te chu Kaziranga national park-a highland 33 awmte chu siamṭha tura hrilhin, tui a lena ramsate tawmhimna hmun a nih vangin ngaipawimawh turin a ti a, lawng leh mo­bile squad-te pawh inpeih­saa dah tur leh, ramsate pawh chaw pe thei tura inbuatsaih turin a ti bawk.

Revenue Department-te pawh tuilen huna chhan­chhuah leh chhawmdawl hna thawk tura inring sa tura hriattirin district tinah mihring leh hmanrua inralring sa turin a ti a ni. Water Resources De­partment-te hnenah pawh tuilian tinep tura project an kalpui mekte chu thawk zo turin a ti bawk a ni. Public Works Department-te chu tuilen laia inbiakpawhna kawnga harsatna a awm lohna tura inbuatsaih tura hriattirin, kawngpuiah harsatna an tawk a nih pawha a rang thei ang bera siamṭha leh thei tura hma la turin a ti bawk.

Public Health Engi­neering Department leh Health Department official-te chu damdawi, halogen tablet, bleaching powder leh mamawh dang hrang hrangte dahkhawl lawksa turin a ti bawk a ni. Hun kal tawha chhiatna an tawh dante thlir nawnin Sonowal chuan Power Department-te chu hmun hlauhthawnawm zual lai ennawn tur leh electric kal­sual vanga thi an awm lohna tura hma la turin a ti a ni.