Manipur : Assam Rifles leh NSCN-IM inkar boruak a sosang

Manipur Urkhul district-a Sihai khuaah Assam Rifles leh hel pawl lian National Socialist Council of Nagalim-Isak Muivah (NSCN-IM)-te inkar boruak chu a sosang chho zel nia tarlan a ni.

NSCN-IM hian Khamasom khuaah dan loin camp an siam a, he an thil tih hian sipai hotute a tilungawi lo hle a, inkahhai thuthlung an siam tawh chu an camp siam hmang hian an bawhchhia niin an sawi. April 26 aṭang khan Assam Rifles sipai-te chuan heng helpawlte hi umchhuah tumin Sihai khua hi an thleng khawm ṭan a, hemi vang hian hel pawlte nena an inkar chu a sosang chho hle. April 27 khan Ceasefire Monitoring Group (CFMG) chuan NSCN-IM hotute hnenah camp chhuahsan turin thupek an chhuah a, mahse hel pawlte hian an thupek chu hnar in an awmna chu chhuahsan an tum lo hle. 

Hetianga dinhmun a nih avangin Assam Rifles-te chuan Sihai khua chu ngawrh takin van lam  leh lei lam atangin an thlithlai reng bawk. Ukhrul chhunga Naga pawl ṭhenkhat chuan boruak muanawm siam turin Assam Rifles leh hel pawlte an ngen a, an khaw mipuite mangang leh thlabar taka an awm thu an sawi bawk.