Tripura-ah micro observer 2 leh presiding officer 3 suspend

West Tripura Lok Sabha consti­tuency-a Lok Sabha inthlan neihnaa micro observer pahnih leh presiding officer pathumte chu thu awih loh vang leh duty ngaihpawimawh loh vangin suspend an nih thu tarlan a ni.

West Tripura Assistant Re­turning Officer (ARO), Sudhakar Shinde chuan Thawhṭanni khan hriattirna tichhuakin, official suspend-te chu -  micro observer pahnih Prof Sangram Sinha leh Bhasan Chandra Das-te bakah presiding officer Promode Chandra Das, Gautam Debnath leh Giridhari Das-te an nih thu a sawi.

Prof Sangram Sinha hi Debipur Gram Panchayat Office-a micro observer tura ruat a ni a, Returning Officer Dr Sandeep Mahatme hnena ARO in lehkha a thawnah chuan inthlan tihbuai a nih leh poll violation thlengte a report lo tih a ziak a, hei hi duty ngaihpawimawh lohna leh thuawih lohna a nih thu a ziaklang bawk. 

Micro observer dang Bhasan Chandra Das, Brajapur Higher Secon­dary School a duty tura ruat pawh booth capturing chungchang leh poll violation chungchang a report loh avangin suspend a nih thu ARO chuan a sawi a ni.

Presiding officer dang suspend-te pawh hi hetiang case tho hi a nih thu tarlan niin, inthlan nia buaina chhuakte an report loh vang a ni tih a sawi. Inthlan chungchang an enfiahnaah  webcam footage leh document ṭhen­khat aṭangin an thil report lohte hi hailan a ni leh si niin election office lam chuan an sawi bawk.

ARO chuan heng official-te lakah hian Inrinni khan FIR a thehlut tawh niin a sawi. West Tripura constituency-ah hian April 11, Lok Sabha inthlan thawh khatna neihnaah khan inthlanna hi neih a ni a, polling station hrang hrangah complaint a tam hle a ni.

Eptu lam Congress leh CPI-M-te chuan BJP chu booth capture leh inthlan tichingpenah an puh a, mahse BJP chuan an pha thung. Hetiang boruak a awm avang hian East Tripura-a April 18-a inthlan thawh hnihna neih tur pawh tihkhawtlai niin, tharum thawhna leh buaina a chhuah hlauhthawn avangin April 23 khan an inthlang ta zawk a ni.