Meghalaya: Keh darh mai thei dinhmunah KHADC EC ding

Sorkar laipuiin a bik taka ṭanpui­na, cheng vaibelchhe 52, Khasi Hills Autonomous District Council (KHADC)-a United Democratic Alliance (UDA) kaihhruai Executive Committee (EC) hnena a pek chuan EC chu harsatna a thlen nia tarlan a ni.

UDA member an nihna aṭanga MDC paruk-ten inhnuhdawhna lehkha an pek avangin KHADC Chief Executive Member (CEM), Teinwell Dkhar chuan harsatna a tawk mek nia tarlan a ni bawk. KHADC-a ṭangrual pawl siama thuneihna siam tute chuan thla hnih vel lek hnuah majority an nei pha ta lo niin a lang. People’s Democratic Alliance (PDA) MDC paruk- NPP pathum, independent pahnih leh PDF pakhatte chu UDA an thlawpna aṭangin an inhnukdawk a ni.

Heng MDC-te hian CEM chu UDA meeting buatsaih tura ngiatin, sorkar laipui aṭanga a bik taka ṭanpuina an dawn chungchang sawifiah turin an phut. Kar khat chhunga meeting hi ko tura ngiatin Thawhlehni thleng khan hun an pe a, CEM in engmah thuchhuah a neih tak loh avang hian MDC parukte hian Nilaini khan banna an thehlut ta niin an sawi.

UDA chhuahsan zinga mi, Inde­pendent MDC Malngiang chuan sorkar laipui aṭanga cheng vaibelchhe 52 dawn a ni tih an hriat thu leh, cheng vaibelchhe 32 chu hmuh a ni tawh tih pawh an hriat thu a sawi. Mahse pawisa la bang, cheng vaibelchhe 28 chu engtianga hman turin nge ruahmanna an siam tih an hre duh tih a sawi.

Hemi chungchangah hian Congress in inrawlhna an nei em tih zawhna chu chhangin, Congress an inrawlh loh thu a sawi bawk. Chanchinthar lakhawmtu ten CEM chu bang turin an duh em tih zawhna chu chhang bawkin, bang turin an phut kher lo nia sawiin, thutlukna chu ama kutah a awm a ni, a ti. Malngiang chuan CEM chu majority a neih tawh loh avangin, kalphung pangaiah chuan bang mai tur a ni, tih a sawi bawk a ni.

Hetihlai hian CEM chuan UDA meeting chu a koh thu sawiin, MDC zawng zawng hnenah pawh meeting kohna lehkha a thawnchhuak vek tih a sawi thung. Heti chunga MDC paruk-ten banna an thehlut chu mak a tih thu a sawi bawk.

CEM Teinwell Dkhar chuan ṭang­rual sorkar United Democratic Alliance (UDA) a kehdarh lohna tur chuan inhnuhhniam a inpeih reng tih a sawi. CEM ni tura thlangtute chu party hruaitute an nih thu sawiin, a ṭul a nih chuan CEM a nihna aṭanga ban pawh a inpeih tih a sawi.

UDA meeting an neih hunah an Council politics buaina chu chinfel a nihna turin a post chu a chhuahsan dawn em tih chu an la sawiho dawn tih a sawi bawk a ni. Thawhlehni khan Hotel Pinewood-ah MDC meeting hi an nei a, hetah hian MDC 10-te chu an tel a ni. CEM chuan MDC-te chuan a bik taka ṭanpuina lo kal aṭang hian MDC tin tan cheng nuai 50 ṭheuh earmark an phut tih a sawi. 

CEM chuan MDC-te thil phut pawh chu ennawn a inpeih tih sawiin, Anti-Defection Law a awm loh avangin MDC-te chu hetiang zawng hian an khawsa ta mai niin a sawi bawk. Nimin khan UDA meeting hi neih leh a ni dawn niin a sawi bawk a, mahse he thu ziah lai hian chanchin hriat hman a ni lo thung.