Tripura Congress VP lakah thubuai thehlut

Tripura-a Congress party Vice President, Tapas Dey chu Chief Minis­ter Biplab Kumar Deb leh a nupui tihmingchhiatna post, social media-a thehdarhah puhin police in a lakah thubuai an thehlut. 

Hemi post thehdarh chung­changah hian mi pahnih man an lo ni tawh bawk. Nilaini khan Tripura local court chuan an man zinga mi Journalist Saikat Talapatra chu phiarruk leh tihhmingchhiat tumnaa inhnamhnawiha puhin a tan hun an pawhsei sak.

Deputy Inspector General Arindam Nath chuan Tapas Dey lakah case an thehluh tawh thu sawiin, Dey hian thu dik lo chu mi ṭhenkhat hnenah a thawn kual ngei tih a pawm thu a sawi bawk. Tapas Dey hi man a la ni lo a, Arindam Nath chuan a man lam an hmanhmawh lo tih sawiin a case chhui tuten an biak thuai tur thu a sawi bawk.

BJP thupuangtu Dr Ashok Sinha chuan, "Tapas Dey hi hotu senior leh dan leh thupek hrechiang tak a ni a, he buaina chungchangah hian dan dik tak leh fel taka kenkawh a ni ang tih chauh ka sawi thei a ni," a ti.