Meghalaya CM-in MDC-te Buaina chingfel turin ngen
Meghalaya Chief Minister Conrad K Sangma chuan Khasi Hills Autonomous District Council (KHADC)-a thuneitu MDC-te chu an buaina chinfel thuai a nih theih nana hma la turin a ngen.
Conrad Sangma chuan United Democratic Alliance (UDA) MDC-te chuan an buaina chu an chinfel a pawimawh tih sawiin, party hruaitute pawh inremna zawng turin a ngen. UDP, NPP leh PDF party hruaitute pawh hemi chungchangah hian a be tawh tih sawiin, Council-a buaina awm chu a rang thei ang bera chingfel tura ngenna pawh MDC-te hnenah thawn chhuah a ni tawh tih a sawi. MDC-te pawhin buaina chinfel nana inbiakna an neih tawh thu a dawng tih a sawi bawk.
Chief Minister chuan tunah chuan buaina chinfel a, Council hmasawnna tur lam ngaihtuah a hun tawh zawk tih sawiin, Lok Sabha inthlan zawh hunah chuan Constitution Sixth Schedule siamṭhatna tura rawtna thlen lam an hawi tawh dawn tih a sawi.
Meghalaya-a KHADC Executive Committee hian buaina neuh neuh an ngah hle a, Thawhlehni-a UDA meeting-ah pawh MDC pariat ngawt an tel lo a, paruk chuan UDA an chhuahsan thu an sawi hial. Mahse nimin khan Hotel Pinewood-ah meeting an nei a, hetah hian buaina chinfelna tur an zawn ngei rin a ni.
Sorkar laipui aṭanga a bik taka ṭanpuina an dawn, cheng vaibelchhe 52 hman dan chungchangah MDC-te hi an inhmuthiam lo nia tarlan a ni a, KHADC CEM Teinwell Dkhar chuan buaina chinfelna tur a nih chuan a dinhmun chhuahsan pawh a hnial loh thu a lo sawi tawh bawk.