Congress-in Meghalaya CM lakah privilege motion put luh tum

Meghalaya-a eptu pawl, Congress party chuan chief minister Conrad Sangma chu House-ah thu dik tawk lo sawi leh midang rilru hruai kawi tuma puhin a laka privilege motion put luh an tum tih an sawi. 

Chief Minister Sangma hian kum 2007-a an state-a Congress kaihhruai sorkarin power leina tura National Thermal Power Corporation (NTPC) nena Power Purchase Agreement (PPA) an ziah dan chu a felfai tawk lo hle niin House-ah a sawi. He inremna an lo ziah dan ang chuan, state sorkarin NTPC aṭanga power a lei loh hnuah pawh thla tin cheng vaibelchhe 11 an pek chhunzawm zel a ngai a ni, a ti. 

Leader of Opposition, Congress hruaitu leh chief minister hlui Mukul Sangma chuan CM thusawi hi chhangin, inremna an siamah state sorkarin Rs vbc 11 a pek a ngai tih engmah ziahlan a ni lo, a ti. Conrad Sangma kaihhruai sorkar chuan an state-in power sector lama harsatna an tawh mekah inlakfihlim tum nia puhin, House leader ngeiin thu dik tawk lo leh midang rilru hruaikawi tuma thu a sawi chu pawi a tih thu a sawi. 

Mukul Sangma chuan inremna lo siam tawh aṭanga inlachhuak tur hian Central Electricity Act hnuaiah kaihhruainate pawh a awm a ni tih sawiin, NPP-MDA sorkar chu tun hma lam thilah buai lo a, power sector dinhmun siamṭhat hna thawk zawk turin a ti bawk.

Chief minister Conrad K Sangma chuan Nilaini khan assembly inkhawmah state budget 2021-22 a pharh a, fiscal deficit hi Rs vbc 1,570 niin hei hi Gross State Domestic Product (GSDP) aṭanga 4.07% vel a tling. 

Chief Minister chuan kum 2021-22 atana sum hmuh tura beisei chu Rs vbc 17,509 a nih thu sawiin, heng zinga Rs 15,232 chu revenue receipt niin, capital receipt chu Rs vbc 2,277 a ni. Sum hman ral tura chhut hi Rs vbc 17,603 niin, heng zinga Rs vbc 13,956 chu revenue expenditure tur a ni a, capital expenditure chu Rs vbc 3,647 a ni bawk. Loan rulhna tur, Rs vbc 771 tel loin, total expenditure estimate hi Rs vbc 16,832 a ni. Kum 2021-22-a interest payment atan Rs vbc 1,047 leh pension payment atan Rs vbc 1,303 ruahman a ni bawk. 

Health sector atan Rs vbc 820 dah niin, budget hmasa aiin 13% in a pung a ni. Education sector atan Rs vbc 980 dah a ni a, water supply sector atan Rs vbc 802 dah a ni bawk. Sports and youth affairs atan Rs vbc 200 dah a ni a, tourism sector tan Rs vbc 100 dah a ni bawk tih CM chuan a sawi.  Shillong International Centre for Performing Arts and Culture zawhfel a nih theihna turin Rs vbc 27 ruahman a ni bawk a ni. 

Sangma chuan budget speech-ah Meghalaya Demo­cratic Alliance (MDA) sorkarin hna a thawh hrang hrangte sawiin, an state nih champha kum 50-na lawm tura an hmalak dante a sawi. State nih champha vawi 50-na lawmna atana event hrang hrang buatsaihna turin sorkar chuan Rs vbc 20 a dah tih a sawi.