Manipur Congress-in President hmuh an tum

Manipur Congress chuan an hruaitu, chief minister hlui Okram Ibobi Singh hoin an state-a BJP kaihhruai sorkarin MLA 12-te parliamentary secretary atana a ruat ban tura an phut chungchangah President hmuh an tum. Congress chuan BJP MLA 12, parliemantary secretary atana ruatte chu 'office of profit' case-ah ban turin an phut a ni. 

All-India Congress Committee (AICC) chuan parliamentary secretary-te ban tura phutna hi state Governor hnenah thlen ni tawhin, Governor hian Election Commission a hriattir tawh a, EC lam pawhin hemi chungchanga an ngaihdan pawh a thehlut tawh niin an sawi. Mahse tun thlengin Governor chuan he thil hi a la tikhawtlai niin an tarlang. 

Congress thupuangtu, Ningobam Bupend Meitei chuan Manipur Congress MLA, Congress MP bakah AICC in-charge Manipur Bhakta Charan Das-te chuan an thil phut chungchang sawipui tur hian President hi hmuh an tum niin a sawi. Congress MLA-te hian Governor Najma Heptullah pawh hmuh an tum a, mahse Raj Bhavan lamin appointment hi a pe duh lo a ni, a ti.