Tripura tribal council inthlan neih hun tur sawn

Tripura state election commission chuan Tripura Tribal Areas Autonomous District Council (TTAADC)  neih hun tura ruat, April 4 chu ni hniha sawn hlain, April 6-ah vote thlak a ni ang. 

A hmaa inthlan hun tura ruat, April 4 chu Kristiante tana hun pawimawh, Easter Sunday a ni a, hei vang hian political party ṭhenkhat leh Kristian pawlte chuan sawiselin, inthlan hun hi sawn turin an ngen a ni. 

Kar liam ta Zirtawpni khan state election commission secretary, Prasenjit Bhattacharjee chuan thuchhuah siamin, party ṭhenkhat leh pawl hrang hrang hnen aṭanga inthlan ni sawn tura ngenna an dawn thu leh, April 4 chu Easter Sunday a nih avanga mi tam tak tana vote thlak a remchan loh thu hi poll panel in a ngaihtuah hnuah, April 6-ah inthlan hun hi sawn a ni ta tih a sawi. 

April 6-ah vote thlak a ni ang a, April 10-ah vote tlate chhiarin result puan nghal a ni ang. 2011 Census report-a a lan danin, Tripura-a cheng zinga 4.35% hi Kristian an ni. TTAADC inthlan neihna tur seat 28-ah hian vote nei mi 8,65,041 an awm a, vote thlakna tur polling station 1,244 siam a ni dawn a, zing dar 7 aṭanga zan dar 9 thleng vote thlak theih hun hawn a ni dawn. 

TTAADC-ah hian seat 30 a awm a, member 28 hi mipuite thlan niin, member pahnih erawh chu Governor-in a nominate an ni thung. Inthlan neih tura chuh tumte tana nomination paper thehluh hun hi kar liam ta Zirtawpni khan a tawp a, candidate 185 in nomination paper an thehlut a ni. Vawiinah heng paper-te hi enfiah a ni dawn a, inhnuhdawk duhte tan March 17 thleng hun a ni hawn a ni bawk.