Akhil Gogoi-a'n CCA duh lohna resolution Assam assembly thara session hmasa berah pass duh

Jail-a tang mek, Raijor Dal president Akhil Gogoi chuan a duhthusam leh a lo suangtawh ṭhin chu Assam legislative assembly inthlan neih zawhah assembly rorel inkhawm neih hmasa berah, Citizenship Amen­d­ment Act (CAA) dodalna resolution pass a nih thu a sawi. 

Kar liam ta khan Gogoi-a lehkhathawn hi press mite hnenah tlangzarh a ni a, hetah hian Raijor Dal hruaitu hian inthlan neih turah Sibsagar constituency-ah a din tur thu leh, assembly-a Assam mi­puite tana thupuangtu a nih ngei theihna tura thlang tling turin  mipuite a ngen thu a ziak. 

Gogoi chuan Assam aṭanga BJP-RSS te um­chhuah an nihna turin theihtawp a chhuah dawn tih sawiin, state mipuite duh dan kalh zawnga hma lak a tum ngai lo ang, tiin a sawi. "Ka tum ber chu mi­puite tana ṭha lo, sorkar policy-te theih­tawpa dodal a, cen­tral sorkarin a duh dan ang anga a thunun theih­na tura state sorkar siam a, state mipuite tana huaisen taka aw chhuah zel a ni," a ti. 

Assembly inthlana a chuh tur chu mipuiten state-ah democracy tundin an duhna leh an rinna chu a taka tihhlawhtlin a nih theih­na atan a nih thu Gogoi chuan a sawi a, amah campaign-a a chhu­ah theih loh avangin Sibsagar-ah chuan a tana lo campaign turin ṭhalaite a chah zui bawk. 

Akhil Gogoi hian constituency pahnih - Sibsagar leh Marania-ah inthlan hi chuh tumin nomination paper a thehlut a, mahse a hnuah Mariani bial aṭang hian a inhnukdawk leh a ni. CAA dodal a lantir vangin kum 2019 December thla khan Akhil Gogoi hi man ani a, UAPA hnuaiah thubuai siamsak niin jail-ah dah a ni. Mahse Covid-19 hri a kai avangin Gauhati Medical College-ah dah luh a ni a, enkawl mek a ni. Assam assembly in­thlan thawh khatna hi March 27 hian neih a ni dawn a, inthlan tawh khatna neihna tur zingah Sibsagar bial hi a tel.