Manipur-a bandh huaihawtin nunphung tikhaihlak

 All Tribal Students’ Union Manipur (ATSUM)-in kar liam ta Inrinnia hill district-a darkar 24 awh total bandh an huaihawt chuan nunphung a tikhaihlak hle. 

ATSUM hian Autonomous District Councils (ADCs) inthlan hun tihkhawtlai a nih zel avanga lungawi loin, Zirtawpni zanlai aṭanga Inrinni zan zanlai thlengin hill district hrang hrangah total bandh hi an huaihawt a ni.  

Bandh huaihawtna hmunah hian dawr, sumdawnna leh zirna inte khar vek an ni a, kawtthlerah motor tlanchhuak pawh an awm lo. Inrinni hian inter-district transport service pawh an chawl vek bawk. 

State-in mamawh a chawk luhna kawngpui, NH-37 leh NH-2 te chuan hill district-te hi an paltlang avangin bandh hian heng kawngpuia motor tlan pawh a nghawng tel a ni. Imphal pan, bungraw phur motor liante chu tlan tlang ngam loin kawngpuiah hian an ding vek a ni.

Hill district pakua huam chhunga ADC paruk term hi a tawp hnuah nikum khan state sorkar chuan thla ruk atan a pawtsei a, an term a pawhseina pawh hi nikum November thla khan a tawp leh tawh a, mahse tun thlengin inthlan hi buatsaih a la ni lo. 

Chief miniser N Biren Singh chuan state sorkarin ADC inthlan buatsaih thuai a tum thu lo sawi tawh mah se, tun thlengin thuneitute lam hian inthlan kalpuina tur hian hmalakna an la nei lo a ni.