Cyclone Fani vangin hmarchhakah harsatna thleng nasa

Cyclone Fani chuan Odisha leh West Bengal-te a nuai hnuah, Inrinni khan Bangldesh lam a panna kawngah hmarchhak hmun hrang hrangah harsatna a thlen nasa hle.

Hmun tam takah power line a tichhia a, rel tlan tur eng emaw zat cancel an nih bakah thlawhtheihna leh kawngpui hmanga inkalpawhna kawngah te harsatna a thlen nasa hle. Inbiakpawhna kawngah pawh harsatna a thlen nasa hle bawk. Cyclone Fani hian ruahtui a ken tel avangin thli tlehna hmunah hian ruah a sur zui nasa hle bawk a ni. 

Assam state khawpui Guwa­hati leh state chhung hmun hrang hrangah Inrinni khan power cut a tam hle a, khawpui chhung hmun lun lai - Uzan Bazaar, Chandmari, Athgaon, Fatasil, Satgaon, Noonmati, Ganeshguri, Beltola leh Maligaon-ahte chuan darkar khat aṭanga darkar ruk chhung electric an nei lo.

Meghalaya-ah pawh kawng­pui ṭhenkhat chu a kaltlang theih loh a, power cut mai bakah phone hmanga inbiakpawhna kawngah pawh harsatna an tawk nasa hle nia tarlan a ni bawk. Meghalaya chhung bikah hian thingkung tlu pawh a tam hle nia tarlan a ni.

Tripura district hrang hrangah pawh ruahsur nasa leh thli tleh nasat vangin harsatna an tawk nasa hle nia tarlan a ni bawk. Khaw­pui chhung kawngpuiahte chuan tui a luang nasa hle tih State Emergency Operations Cen­tre (SEOC) chuan an sawi. 

Manipur, Nagaland, Aruna­chal Pradesh bakah Sikkim leh Mizoram hmun ṭhenkhatahte chuan thli hi a na hle bawk.