Meghalaya-in sorkar laipui aṭangin Rs. vbch 800 chuang phut

Meghalaya sorkar chuan kum 2019-2020 annual plan leh budget rawtna sorkar laipuia thehluh tur a duan zawh tawh thu a puang. He budget rawtnaah hian Union Ministry of Human Resource Development (MHRD) aṭangin Samagra Shiksha Abhiyan (SSA) atana hman turin fund vaibelchhe 800 chuang an phut.

SSA chungchang ngaih­tuahna, State Executive Co­mmitte kar hmasaa kohah khan hemi scheme atana budget leh kum khat chhunga ruahmanna tlangpui turte an duang a ni. Annual plan leh budget hi May 7-a Project Approval Board (PAB) Delhi-a neih tura thehluh an tum tih Education Department chuan an sawi. Samagra Shiksha Abhiyan scheme hian sorkar laipui bultum scheme pathum - Sarva Shiksha Abhiyan (SSA), Rashtriya Madhyamik Shiksha Abhiyan (RMSA) leh Teacher Education-te chu khaikhawmin, fund-te pawh a huhoin an duang ṭhin a ni.

Meghalaya sorkar hian kum 2018-2019 academic year chhung atan MHRD hnen aṭang hian vaibelchhe 623 a lo dil tawh a, ministry hian cheng vai­bel­chhe 523 pek an remti thung. Mahse he an tiam zat aṭang hian cheng vaibelchhe 237 chauh MHRD hnen aṭang hian an dawng tih an sawi. A bak chu state sorkar kuta nghah niin state sorkar hian cheng vaibelchhe 94 chauh an pe nia sawi a ni.

Samagra Shiksha Abhiyan hnuaiah hian zirtirtu 12,451 awmin, Meghalaya sorkar hian zirtirtute hi hlawh regular taka pek a harsat mai bakah MHRD hian zirtirtute hlawh tur aia tlem thlatin an sanction a ni. A bak chu state sorkar in state pawisa aṭanga a pek a ngaih thu tarlan a ni bawk.