Meghalaya: Mendipathar railway station-ah entry-exit point siam vat dawn

Ministry of Railways chuan Meghalaya sorkar in an state chhunga railway station an neih chhun - Mendipathar Railway station-a entry-exit point siam an rawtna chu a pawmsak. 

Chief Minister, Conrad K Sangma chuan hemi chungchang hi sawiin, Ministry of Railways chuan an rawtna chu an pawmsak thu leh thla khat chhungin Mendipathar RS-ah chuan hna an ṭan nghal dawn tih a sawi. State chhunga dan loa luh huk an awm theih chungchang chu an ngai pawimawh hle tih sawiin, sokar chuan hemi pumpelhna tur kawng hrang hrang hi an zawng dawn tih a sawi bawk. State chhung hmun hrang hrangah entry-exit point siam a nih hunah chuan dan loa state chhunga lut chungchangah pawh NGO-te chu inringtawk takin an awm thei tawh dawn tih a sawi a, Ri Bhoi-a entry-exit point siam tur chu a rang thei ang berin an ṭan dawn tih a sawi a ni.

Conrad K Sangma chuan  Tetelia-Byrnihat- Shillong rail­way line siam chungchang pawh sawiin, hei hi level hrang hrangah la sawi a ngai tih a sawi bawk. Meghalaya hian railway station pakhat chiah an nei a, Garo Hills-a Mendipathar-a awm a ni. Khasi Hills lamah pawh neih tumin nasa takin ṭan an la a, Byrnihat-a station awmna turin hma an la a ni. Mahse pressure group-te nawrna avangin hna pawh an chhunzawm thei lo a, vawiin thleng hian hna chu an la chawlhsan. 

CM Conrad Sangma hian kar hmasa lam khan North East Frontier Railways (NFR)-te meeting neihpuiin, railway project chungchang hi a sawipui tawh bawk. Meghalaya NGO-te hian an state chhungah hian rel pangngai taka service tir a nih chuan dan loa state chhunga lut eng emaw zat an awm dawn nia sawiin, an hlauthawng a ni.