Assam sorkarin Organic Agricultural University din dawn

Assam Chief Minister Sar­bananda Sonowal chuan Organic Agricultural University an din thuai dawn tih a sawi.

Inrinni-a Assam Agricultural University (AAU) convocation vawi 21-na hmannaa a thu sawiah Sarbananda Sonowal chuan Organic Agricultural University dinna turin hma an la mek tih a sawi a ni. AAU Jorhat campus-a thu a sawinaah hian Chief Minister chuan OAU dinna tura project report-te chu AAU duan vek a nih thu sawiin, AAU chuan sorkar hnenah an thehlut leh tih a sawi bawk. 

OAU chu an state in an ma­mawh hle tih sawiin, an state chuan organic sector-ah theihna nasa tak an nei tih a sawi. University sakna tur ram chu an tihfel thuai dawn thu sawiin hna pawh an thawk mek reng tih a sawi a ni.

Sonowal chuan AAU hnuaia veterinary college an neih pawh chu tihchangtlun zel an tum tih sawiin veterinary field-a an mamawhna enin independent university-a siam an tum tih a sawi bawk. AAU chuan a tih­changtlunna tur road map pawh an buatsaih tih sawiin sorkar hnenah an thehlut tawh tih a sawi.