Meghalaya: Assembly building thar sak hna ṭan

Meghalaya PWD (Building) Minister Co­mi­ngone Ymbon chuan Thawhṭanni khan  Maw­diangdiang-a Assembly building thar tur sak hna chu ṭan a nih thu a sawi.

New Shillong Town­ship-a Assembly building thar tur ground work chu kar hnih liam ta aṭang khan ṭan a ni tawh tih sawiin, sorkar chuan thla 36 chhunga project zawh hman a tum tih a sawi bawk. Contract thawktu firm-te pawh hna tikhaihlak thei thil hrang hrang laka inthiarfihlim turin a ti tih a sawi a ni.

High Powered Committee chuan nikum February thla khan Assembly building thar sakna tur hna hi Government based Public Sector Understanding, Rajkiya Nirman Nigam Ltd. hnenah a hlan a, cheng vaibelchhe 127 sen a ni ang.

Chief Minister Conrad K Sangma pawhin project thawhna tur atana pawisa mamawhte hi agency hrang hrang, state sorkar mai bakah sorkar laipui aṭangte pawhin an dap tih a sawi tawh bawk.

Sorkar chuan Assem­bly building sakna tur atan hian budget atan cheng vaibelchhe 145 an dah a, mahse firm kutah hian cheng vaibelchhe 127 hi dah a ni thung. Chief Minister chuan 2023 Assembly inthlan hma ngeiin project chu thawh zawh hman an beisei thu a sawi a ni. Kum 125 zeta upa Me­gha­laya state Assembly building chu kum 2001 khan a kang chhia a, hemi hnu hian Assembly building mumal an la nei leh lo a ni.