NEIGRIHMS buainaah Union Health Minister inrawlh turin ngen

North Eastern Indira Gandhi Regional Institute of Health and Medical Sciences (NEIGRIHMS) buaina kal zelah Meghalaya sorkar chuan Union Ministry of Health and Family Welfare hnenah lehkha ziakin an buaina chinfelna kawnga inrawlh turin a ngen.

Meghalaya Health Minister AL Hek chuan Thawhṭanni khan Union Health Minister JP Nadda hnenah ziakin an buaina chungchang chu a thlen tawh tih a sawi a, a rang thei ang bera an buaina chinfelsak an beisei tih a sawi bawk.

AL Hek chuan buaina chinfel hna chu a pawimawh thu sawiin damlo enkawl ngaiten an mamawh ang an hmuh chu a ṭul hle tih a sawi a ni. NEIGRIHMS Director hnenah pawh lehkha ziakin buaina chinfel dan tur ngaihtuah tur committee din turin a ti.

NEIGRIHMS-ah hian Director Dr. DM Thappa leh Cardiology department HoD Dr Animesh Mishra-te chu an inhmuthiam lo a ni. April 30 khan Cath Lab-a hman tur medical item chu Amrit Pharmacy-a lei lo a,  private dawr aṭanga an lei avangin Director hian a mansak a, hei hi Ministry of Health and Family Welfare thupek kalh a nih vanga mansak a nih thu tarlan a ni. Hemi hnu hian Thappa leh Mishra-te hia an inhmuthiam lo zui a ni.

Hotu pahnih inhmuhthiam loh vang hian Cardio department chu an mumal lo chho hle a, mahse tunah chuan Cardio hian OPD pawh an hawng leh tawh nia sawi a ni thung. Tunah hian damlo pasarih ICU-ah an awm mek a, dinhmun ṭha lo tak takte an nih hlawm laiin hmanrua an neih loh avangin engmah hmalak zui theih a ni lo tih thulakna chuan a tarlang.