Assam-ah Rajnath Singh a campaign

Defence minister Rajnath Singh chu Pathianni khan Assam-ah a campaign a, Biwanath constituency-a rally buatsaihah thu a sawi. 

Rajnath Singh chuan, BJP-in Assam ram humhim zel a tum tlat tih sawiin, heihi musician Dr Bhupen Hazarika henna civil mi chawimawina sang ber, 'Bharat Ratna' an pekna chhan pawh niin a sawi. "Bhupen Hazarika hnena Bharat Ratna chawimawina kan pek hi Assam kan zahna leh ngaihhlutna lantirna a ni," a ti. 

Dan loa Bangladesh aṭanga pem lutte chungchang pawh sawichhuakin, Defence Minister chuan Bangladesh aṭanga India rama dan loa lutte danna turin Dhubri border pawh hung vek a nih thu a sawi a, ramri venhimna atan hian electronic surveillance leh technological dangte hmang tura a tih thu a sawi bawk. 

Assam-a BJP-in sorkarna a siam hnuah firfiaka chetna pawh a tlahniam nasa hle tiin Singh chuan a sawi a, "Firfiaka chetna te, inlakhran duhte pawh an tlahniam zel a, Assam chuan hmasawnna kawng a zawh mek a ni," a ti. 

Assam assembly inthlan neih turah hian BJP chuan thuneihna chan chhunzawm leh ngei tumin ṭan an la hle a, party star campaigner 40 ruat zingah hian prime minister Narendra Modi, union home minister Amit Shah, defence minister Rajnath Singh, BJP president JP Nadda te pawh an tel a ni.