AP Dy CM-in motorcycle rally vai liam

Arunachal Pradesh deputy chief minister Chowna Mein chuan Pathianni khan Namsai-a  Kongmukham (Golden Pagoda) aṭangin ‘Honda Sunchasers 2021-H’ness Quest for the Land of the Rising Sun’ motorcycle rally a vai liam. 

Chowna Mein chuan motorcycle rally-in an state tourism a chawi lar phah tur thu leh, adventure lama tui mi tam tak an state-ah an hip luh phah ngei a beisei thu a sawi. 

Arunachal Pradesh chu India rama tourist destination nei ṭha pawl zingah a tel tih sawiin, tourism chawi larna turin state sorkar pawhin theihtawp a chhuah mek a ni, a ti. Tourism department leh Hondo motorcycles-ten an state chu 'motorcyle riding destination' ṭha ber zinga mi a ni tih lantirna tura mega motorcycle rally an buatsaih chu fakawm a tih thu a sawi bawk. 

Prime minister Narendra Modi-a'n kum 2020, August 15-a thu a sawiah, ram pawn lam bakah India ram chhunga tourist hmun nuam tak takte tlawh tura khualzinte a sawm thu Mein chuan a sawi a, PM thusawi bawhzuina atan hian tourism ministry chuan 'Dekha Apna Desh' scheme a siam tih a sawi bawk. He scheme hnuaiah hian ministry chuan ramchhunga khualzinte chu India rama hmun hrang hranga tourist destination 15 tal tlawh a, heng hmuna an thlalakte chu an website-ah upload turin an sawm a ni. Ram chhunga tourist hmun 15 tlawhte hnenah ministry chuan lawmman pek a tiam bawk. 

Motorcycle rally-ah hian rider 15 an tel a, Namsai aṭanga tlan ṭanin, Pasighat, Bomjir, Tezu (Parsuram Kund), Miao, Namdapha leh Pangsau Pass-te tlan tlangin km 800-a thui an tlan a ni.