Yogendra Yadav-a'n Akhil Gogoi tlawh

Activist Yogendra Yadav chuan Pathianni khan Gauhati Medical College Hosptital-a enkawl mek,  Raijor Dal president Akhil Gogoi a tlawh. Yadav hi Kisan Sangharsh Samiti leader Sunilam-a'n a ṭawiawm. 

Gogoi a hmuh hnua chanchinthar lakhawmtute a kawmnaah, Yadav chuan Assam mipuite chu BJP sorkar paihthla ngei turin a ngen.  BJP chuan loneitu hmakhua a ngai lo a, an tana ṭha lo zawnga thutlukna an siam avangin inthlan lo awm turah hneh a, an rorelna paihthlak ngei a ngai a ni, a ti. 

Yadav chuan Assam-a rorellai, BJP-in Gogoi chu a rilru lam thlengin nasa takin an nghaisa a, a hriselna dinhmunte pawh a chhiat phah hle bawk tih a sawi. Gogoi hi hren beh luih niin, inthlan neih tura chuh tum mah se tumah a hmu thei lo a, hetianga a chunga sorkar thiltih dan hi 'criminal trial' ni loin, 'political trial' zawk a ni, tiin a sawi. 

Congress party-in Gogoi-a dinna biala candidate hran an siam pawh chu ngaihtuah ṭha turin Yadav chuan a ngen bawk. Eptu party hrang hrangte chu BJP paihthlak a nih theihna atana inlungrual a, BJP candidate awmna apiangah common candidate siam turin Yadav chuan a ngen bawk.