Tripura: Polling booth 168-ah vote thlak ṭha dawn

Election Commission chuan thuchhuah siamin West Tripura Parliamentary constituency-a polling booth 168-ah May 12 hian inthlan ṭhat buatsaih a nih dawn thu a tarlang.

West Tripura Parliamentary constituency-ah hian Lok Sabha inthlan thawh khatna neih ni, April 11 khan inthlanna neih a ni a, inthlan zawh hnuah hian complaint a tam avangin booth 168-ah inthlan ṭhatna hi neih a ni dawn ta a ni.

Tripura-a eptu pawl Congress leh CPI(M) chuan BJP chu inthlan tichingpen leh booth capture-ahte an puh a, Election Commission of India hnenah complaint an thehlut a ni. Hemi bawhzui hian ECI chuan nimin khan thupek tichhuakin May 12 hian booth 168-ah inthlan ṭhatna hi neih a ni dawn tih a tarlang.

May 12 hian Lok Sabha inthlan thawh rukna neih a ni dawn a, hemi rual hian Tripura West seat-ah hian inthlan ṭhatna hi neih a ni ang. Tripura West parliamentary constituency-ah inthlan ṭhatna neih a nih dawn avang hian paramilitary force company 15 dahluh belh nghal a ni a, official-te chuan EC in thurawn a pek angin Border Security Force company 11 leh Central Reserve Police Force company pali an dahluh thu an sawi.