NEIGRIHMS thubuai: High Court-in Director leh Cardio HoD-te Buaina chinfel dan ngaihtuah turin a ti
Meghalaya High Court chuan Nilaini khan North Eastern Indira Gandhi Regional Institute of Health and Medical Sciences (NEIGRIHMS) thubuai ngaihtuahin, damdawi-in director Dr D.M. Thappa leh Cardiology Department HoD, Dr Animesh Mishra-te chu an ko a ni.
High Court chuan director leh Cardio HoD chu an buaina chinfel dan ngaihtuah turin a ti a, damlo ten an tawrh lohna tura hma la turin a ti bawk. Chief Justice Mohamad Yaqoob Mir leh Justice HS Thangkhiew-te kaihhruai bench chuan NEIGRIHMS Medical Superintendent chu Cardiology Department-te nena meeting ko turin an ti bawk a, nimin May 9 khan buaina chinfelna tur ngaihtuah chhuak turin an ti a ni.
Court chuan Meghalaya Chief Secretary hnenah pawh thupek an pek thu sawiin, NEIGRIHMS meeting kaihruai tur hian Additional Chief Secretary ruat turin an ti a ni. Meeting-ah hian Director NEIGRIHMS, Head of Department Cardiology Department, Dr. Animesh Mishra, Medical Superintendent, NEIGRIHMS-te chu tel ngei turin an ti a, Ministry of Health aiawh pawh tel turin an ti bawk. Amrit Pharmacy aiawhte pawh tel turin an ti a, committee in thutlukna an siam ang ang chu Thawhṭanni-a hearing an neih leh hunah Court hnenah thehlut turin an ti.
Court chuan May 13 hian thubuai hi ngaihtuah leh turin thupek a tichhuak bawk. NEIGHRIMS-ah hian Director Dr DM Thappa leh Cardiology department HoD Dr Animesh Mishra-te chu an inhmuthiam lo a ni. April 30 khan Cath Lab-a hman tur medical item chu Amrit Pharmacy-a lei lo a, private dawr aṭanga an lei avangin Director hian a mansak a, hei hi Ministry of Health and Family Welfare thupek kalh a nih vanga mansak a nih thu tarlan a ni. Hemi hnu hian Thappa leh Mishra-te hi an inhmuthiam lo zui a ni.