2012 BSNL inbumna thubuaia tel nia puh CBI Shillong-ten man

Central Bureau of Investigation (CBI) Shillong chuan kum 2012-a BSNL inbumna thubuaia inhnamhnawiha tel nia puh chu May 5 khan Bihar-a Madhubani-ah an man.

An mi man hi Nilaini khan Shillong-a CJM Court-ah hruai a ni. Court chuan CBI Shillong kutah ni riat chhung hren rih turin thutlukna a siam. CBI-tena an man hi Bihar mi, Raj Narayan Rai a ni a, kum riat chhung vel zet zawn a nih hnuah Inrinni liam ta khan an man ta a ni. January leh February 2012-a BSNL Shillong account aṭanga cheng nuai 60 lakchhuah thubuaiah khan a inhnamhnawih nia puh a ni a, cheque lem leh signature lem hmanga pawisa lakchhuah thubuaiah a inhnamhnawih tih an sawi. 

Heng pawisa lakchhuahte hi bank acoount pakuaah transfer a ni a, West Bengal, New Delhi leh Andhra Pradesh-a Nationalised Bank account-ah te tranfer a ni tih tarlan a ni. Bank account zawng zawngte hi document lem hmanga hawn an ni vek bawk.

He thubuaia inhnamhnawih nia hriat zinga mi Bidyut Sarkar pawh Kolkata-ah CBI-ten an man tawh a ni. BSNL rawkna thubuaiah hian mi panga vel an inhnamhnawih nia hriat a ni a, mahse an mi rinhlelh tam zawk hian document lem an hman avangin chhui zui an har hle tih thulakna chuan a tarlang. 

Raj Narayan Rai man a ni hi CBI chuan hlawhtlinna lian takah an ngai a, ani hnen aṭang hian Investigating Agency-te chuan thu tam zawk hriat belh theih an in beisei a ni.