Indo-MyanMar border-ah Mihring hmanga sumdawnna enfiah

Manipur-a India leh Myan­mar inrina chu mihring hmanga sumdawnna kalkawngah hman a nih ṭhin avangin Assam Rifles-te chuan uluk takin ramriah enfiah hna an thawk tih official-te chuan Nilaini khan an sawi.

Assam Rifles-te hian mi­hring hmanga sumdawnna lam mai bakah ruihhlo hralh rukna kalkawng a nih bawk avangin helam kawngah pawh hian hma an la tih an sawi a ni. Official-te chuan Moreh-a cheng tualchhung mite pawh identity proof pangngai nena zin turin an chah bawk.

Manipur-ah hian ram pahniha tualchhung miten inhriatthiam tawnna an neih angin, km 16 chin ve ve thleng document nei lo pawhin an kal thei a ni. Assam Rifles official chuan Chandel, Churanchandpur leh Ukhrul district-ahte chuan hel an awm tih report an dawn avang leh, ruihhlo zuar ṭhinte leh mihring hmanga sumdawn chingten kalkawnga an hman ber a ni tih report an dawn avangin hma an la tih a sawi.

Tunhnaia Mizorama Ro­hingya raltlan nia hriat mi 12 chhanchhuah an nih bakah NSCN(IM)-ten phalna nei loa ramri bulah camp an siam avangte in Assam Rifles lam hian beihpui an thlak ta nia sawi a ni bawk.