Meghalaya CM laka privilege motion put luh hnawl

Meghalaya eptu party, Congress-in chief minister Conrad K Sangma chu kum 2007-a state sorkarin NTPC nena power leina tura inremna an ziah danah thil dik tawk lo leh midang rilru hruaikawi tuma thusawia a laka privilege motion an put luh chu voice vote hmanga hnawl a ni. 

Vote laka hma hian debate neih niin, eptu leh rorellai MLA-te an inhnial nasa hle. Congress MA Zenith Sangma chuan CM lakah privilege motion hi pu lutin, March 9-a budget session-a zawhna a chhannaa CM-in NTPC hnenah hian power an lei tawh loh hnuah pawh Congress sorkar laia inremna an lo siam tawh angin, thla tin sorkarin cheng vaibelchhe 11 a pek chhunzawm zel a ngai nia a sawi chu, inremna an siamah hian hetiang hi ziahlan a ni lo, a ti. 

Zenith Sangma chuan kum 2007-a inremna ziahah khan NTPC hnenah kum khatah Rs vbc 133 pek ziah tur tih leh, kum 25 chhungin Rs vbc 3,325 pek tur tih pawh sawilan a awm lo niin a sawi bawk. NTPC hnen aṭanga power lei chhunzawm a duh tawh loh pawhin, state sorkarin he inremna lo siam tawh a chhuahsan theih dan tur pawh dah tel a nih thu a sawi a ni. 

Chief Minister chuan an state-a power lama harsatna an tawh chu tun maia inṭan ni loin, kum rei tak tawh aṭanga lo inṭan tawh, NTPC agreement an siam lai pawha awm tawh a ni, tiin a chhang. "NTPC hian thla tinin fixed charge, Rs vbc 11.8 bill a siam a, NTC hnena leiba hi state sorkar chuan Rs vbc 100 pe tawhin, ba la awm hi Rs vbc 531 a ni," a ti. A thusawi a dik loh nia eptuten an sawi chu sawifiah turin a  ti bawk. 

Debate neih hnuah Speaker chuan Zenith hi a motion put luh hi a sut dawn em tih a zawt a, sut a tum loh thu a sawi hnuah vote lak niin, voice vote hmangin CM laka motion put luh hi hnawl a ni ta a ni.