Manipur sorkarin kum 4 chhungin project thar 311 siam

Manipur-a BJP kaihhruai sorkar chuan Thawhṭanni khan kum li a tling a, kum li chhung hian department 28 hnuaiah project 311, cheng vaibelchhe 1,095.5 hu an siam hman. 

Heng project siam tawh bakah hian project thar 39, cheng vaibelchhe 278.77 senga thawh tur lungphum phum a ni bawk. Chief minister N Biren Singh chuan kum li chhungin an state-ah boruak muanawm leh inpumkhatna ṭha tak bakah, hmasawnna nasa tak a thleng tih a sawi. "State mipuite lawmpuina ka hlan a, prime minister Narendra Modi leh union home minister Amit Shah-te min thawhpuina avangin lawmthu kan sawi bawk a ni.  Anni vang hian kan state-in hmasawnna nasa tak kan neih phah a ni," a ti. 

Singh chuan council of  minister, MLA leh official dangte chungah an thawhpuina avangin lawmthu a sawi bawk. "Mipuite dah pawimawh hmasa ber sorkar siam zel kan tum a, tlang ram leh thingtlang lamah pawh kalin, mipuite nen inzawmna ṭha zawk siam tumin kan bei zel dawn a ni," tiin CM chuan a sawi.