Tripura-in Nepal-ah rubber thawn chhuak

Tripura-a rubber thar chhuah chu Nepal ramah thawn a ni tih Rubber Board official-te chuan an sawi. 

Rubber Board official Arunabha Majumder chuan rubber sheet ton 18 chu Nepal-a Biratngar-a pheikhawk siamtu company hnenah thawn a ni tih a sawi a, a hma pawhin Tripura hian Bangladesh ramah natural rubber hi a lo thawn chhuak tawh ṭhin tih a sawi bawk. 

Tripura hi India ram state zingah Kerala dawta rubber thar chhuak tam ber a ni. Rubber hi ram hectare 85,500-a zauah chingin, kumtinin ton 62,000 vel an thar chhuak ṭhin. Rubber chin hi chhungkaw nuai 1.5 velin eizawnna atan an hmang a ni. 

Tripura Industries and Commerce department chuan an state-in rubber-based industry-te neih ve loh avangin rubber tharchhuah zinga 90% chuang chu state pawn lamah thawn chhuah a ni tih sawiin, kumtin cheng vaiblechhe 600 vel an hmu chhuak ṭhin a ni. 

Hmarchhak state dangah pawh rubber chin hi an uar chho zel a, Assam-ah ram hectare 58,000-a zau rubber chinna hmun siamin, kum khatah ton 31,000 an thar chhuak bawk. Meghalaya-ah hectare 17,000-a zauah chingin ton 9,500 an thar a, Nagaland-ah hectare 15,000-a zauah ton 6,100 leh, Manipur-ah hectare 4,200-a zauah kum khatah ton 2,000 an thar chhuak bawk.