Chinese online travel agency-in An website-a AP lanna paih
China rama online travel agency lian ber Ctrip chuan an platform aṭangin Arunachal Pradesh-a zin theihna leh thlenna tur an hlui ṭhinte chu an paih.
Chinese netizen-ten hemi chungchanga dodalna an siam hnuah Ctrip hian an platform aṭang hian Arunachal product hi an paih ta a ni. Ctrip.Com International Limited hi Chinese global travel service a ni a, China ramah chuan online travel agency lian ber an ni mek nia sawi a ni. Global Times chuan Ningani-a report an tihchhuahah Ctrip webpage leh phone application-a South Tibet ti lo a Arunachal Pradesh tia ziak awm screenshot chu an tarlan thu an tarlang. Hei hi netizen-te chuan an helh hle a, Ctrip chuan South Tibet region chu Indian Territory-ah an huamtir tih sawiin, zau takin an ram chu an zuar dawn em ni? tiin zawhna Nilaini khan an siam hial.
Ctrip lam pawhin thuchhuah siamin China ram inpumkhatna leh ram chin chu humhim an tum reng tih sawiin hetiang thil hi a thlen nawn leh tawh lohna turin hma an la dawn tih a an sawi ve bawk. China hian Arunachal Pradesh hi a ram chin a ni tih a sawi a, South Tibet peng pakhatah a puang a ni. Thla hmasa lawk pawh khan Chinese official-te chuan Arunachal Pradesh, India ram china rin luhna map nuai thum chuang an tichhe tawh bawk. India sorkar hruaituten Arunachal an tlawh pawh hi China chuan a helh ṭhin hle a ni.
India leh China hian ramri chungchangah hian ṭum 21 inbiakna an nei tawh a, inremna mumal an la siam thei lo. Ram pahnih hian an ramchin chungchanga an chhal ve ve, inrem theih lohna Line of Actual Control (LAC) km. 3,488 laia thui an nei a ni.