Manipur Congress in BJP sawisel; 'FIR sorkar' tiin an hming phuahsak

Manipur Pradesh Congress President leh senior legislator, Gaikhangam Gangmei chuan BJP kaihhruai state sorkar chu an duhdan kalha thusawi apiang laka FIR thehlutah a puh. BJP sorkar chu FIR sorkar tiin a sawi bawk.

Thawhlehni-a Congress Bhavan-a Seva Dal hmuchhuaktu Dr NS Hardikar piancham vawi 131-na lawmna hun hmannaa thu a sawiah Gaikhangam Gangmei chuan sorkar chuan anmahni ṭhatna tur lam hawi zawnga sawisel tu emaw, thurawn petu emawte lakah pawh FIR an thehlut zel tih a sawi.

Deputy CM hlui chuan mipuite pawhin sorkara rinna an neih chu an hloh ṭan tawh tih a sawi a ni. Wangkhem constituency Congress MLA K Meghachandra-an thu khauh tak a sawi avanga a laka FIR thehluh pawh chu thil awm lo tak a ni tih a sawi a, polling station 12-a inthlan ṭhat a ngai chuan inthlanna dik leh zalen a awm lohzia a tilang tih a sawi bawk.

Gaikhangam chuan Prime Minister Narendra Modi pawh sawiselin, Congress hruaitu hlui leh Prime Minister hlui Rajiv Gandhi a sawiselna chu chhan awm lo, sorkar laipuiah thuneihna an chang tawh dawn lo tih tilangchiangtu a nih thu a sawi a ni.