Assam-ah NRC chak takin kalpui chhunzawm

Assam chuan Lok Sabha inthlan an hmachhawn zo ta bawk a, chak takin National Register of Citizens (NRC) an kalpui chhunzawm leh tawh tih an tarlang.

Report-a tarlan danin hearing 65% vel chu zawh fel a ni tawh a, objection thehluttu ṭhenkhat erawh an inlan lo nia tarlan a ni a, hemi buaipuitu officer-te chuan heng case-te hi an document thehluh  indawt danin an buaipui dawn tih an sawi.

Assam Tribune in an tarlan dan chuan hmun eng emaw zatah objection siam si, hearing neih dawna inlan lo an awm a, mahse objection siam tawh hrim hrimte chu an document enfiah vek a ni dawn thung. Inthlanna neih zawh a nih hnu khan circle officer-te leh Deputy Commissioner-te chuan NRC claims & objections lutte enfiahna hi an neih chhunzawm nghal a ni.

Supreme Court chuan July 31 chu NRC final list tihchhuah ni turin a ruat a, hei hi sawn hla tura ngenna lut mah se Ningani khan SC chuan thupek thar tichhuakin ni khat pawn tihkhawltlai a ni tur a ni lo, a ti. Assam hian NRC draft list hi ṭum hnih a tichhuak tawh a, Supreme Court enpuina hnuaiah NRC hi kalpui a ni.