Hailakandi-ah buaina a chhuak Curfew puang nghal

Assam-a Hailakandi district-ah Zirtawpni liam ta khan buaina nasa tak a chhuak a, mi 15 in hliam an tuar a, thi pawh an awm bawk.

Zirtawpni chawhnu khan kawngpuia Muslim-ten ṭawngṭai an tum duh loin pawl pahnih inkarah buaina nasa tak a chhuak a, lirthei pawh 20 bawr vel tih­chhiat a nih thu tarlan a ni. Inrinni khan Assam sorkar chuan mitthi chhungte hnenah hian zángnadawmna cheng nuai nga pek a nih dawn thu leh hliam tuarte hnenah pawh cheng sing nga ṭheuh an pek dawn thu a sawi.

Hailakandi buaina chhuak vang hian nizan dar 7 thleng khan curfew puan a ni a, internet service pawh Barak Valley pumah tihtawp rih a ni nghal bawk. Assam Chief Minister Sarbananda Sonowal chuan buaina chhuak chu chhui zui nghal turin thupek a tichhuak tawh bawk a ni.

Hliam tuarte hi Silchar damdawi-inah enkawl nghal an ni a, hliam tuar zingah hian police pathum an tel. Hai­lakandi District Magistrate chuan district pumah Section 144 CrPC a puang nghal a ni. Buaina lian zawk a chhuah lohna turin sipaite chuan venhim hna an thawk nghal a, Zirtawpni hnulamah erawh buaina chhuak report a awm tawh lo niin thulakna chuan a tarlang.