Manipur-a accident thleng 100 zelah mi 23 thi: Report

Ministry of Road Transport and Highways, Transport Research Wing report tihchhuah chuan  tunhnaiah Manipur-ah lirthei chesual a tam hle a, accident thleng 100 zelah mi 23 in nunna an chan ang zela chhut theih a ni tih a tarlang.

Transport Research Wing report hi 'Road Accident in India 2017' tih a ni a, report-ah hian kum 2017 chhung khan lirthei chetsualna ṭum 4,64,910 a thleng tih tarlan a ni a, mi 1,47,913 in nunna an chan a, hliam tuar mi 4,70,975 an awm bawk. 

Manipur bikah chuan 2016 khan lirthei chetsualna ṭum 538 thlengin mi 81 in an thih phah a, 2017 khan chetsualna ṭum 578 thleng lehin mi 136 in an thih phah bawk. Report chuan accident thleng 100 zelah mi 23 in nunna an chan tih a tarlang bawk a ni.

2017 kuma lirthei chesual 66% hi chu tlan chak vanga thleng a nih thu tarlan a ni a, khawpui aiin thingtlangah chetsualna hi a thleng ngun zawk bawk.  Chetsualna tawkte hi a tlangpuiin kum 25-35 inkar an ni hlawm tih a tarlang bawk.